Os sindicatos do ensino concertado galego valoran de xeito moi positivo o éxito da xornada de folga celebrada hoxe, no primeiro día da volta ás aulas. Cunha participación superior ao 60%, as seis organizacións convocantes (CCOO, FSIE, UGT, FeUSO, SNEP e CIG) consideran que o dato evidencia «o profundo malestar do sector» ante o bloqueo da negociación e os «continuos desprezos» da Consellería de Educación.
As central sindicais destacan a elevada resposta do persoal a pesar dos servizos mínimos impostos pola Xunta, aos que cualifican de «abusivos e disuadidores». Ademais, denuncian que estas restricións supoñen «un agravio comparativo inaceptable» respecto dos servizos fixados nas convocatorias do ensino público, creando unha discriminación que o sector «non vai tolerar».
Un sector unido no inicio do curso escolar
A protesta trasladouse tamén ás rúas das principais cidades de Galicia. Milleiros de docentes e persoal complementario participaron nas concentracións convocadas, destacando a gran convocatoria rexistrada en Vigo como proba da «forza, unidade e capacidade de mobilización» do colectivo.
Os sindicatos lembran que o ensino concertado representa preto do 30% do sistema educativo galego, polo que esixen á Administración o recoñecemento e a dignificación que lles corresponde.
Principais Reivindicacións do Sector
- Fin do bloqueo negociador: Recuperación do diálogo social e cumprimento dos acordos xa asinados.
- Melloras salariais e laborais: Condicións dignas que eviten que o persoal se sinta tratado como «profesionais de segunda».
- Igualdade de trato: Mismos criterios e dereitos que os aplicados no ensino público.
«Mañá comeza unha nova etapa de loita»
As seis organizacións sindicais trasladan un aviso contundente á Consellería de Educación diante dun curso que se prevé «complicado»:
«Se deciden seguir ignorando as demandas das traballadoras e traballadores, atoparán diante un sector unido e disposto a continuar loitando. Esta mobilización non remata hoxe; mañá mesmo comeza unha nova etapa de loita», advirten.
Os sindicatos conclúen agradecendo o apoio masivo dos profesionais que secundaron o paro e instan á Xunta a decidir se prefire «escoitar e negociar» ou continuar profundando no conflito educativo.
