O grupo municipal do BNG de Valga volve exixir á Xunta de Galicia e ao Sergas a cobertura inmediata de todas as baixas, vacacións e permisos do persoal no Centro de Saúde de Baño. A formación nacionalista advirte de que a falta de substitucións é un problema estrutural que se traduce en demoras nas listas de espera e nun deterioramento constante da atención médica de proximidade.
Pediatría ao límite: 1.239 menores e sobrecarga comarcal
A situación de precariedade resulta especialmente grave na área de Pediatría. Segundo datos oficiais do Sergas, o Servizo de Atención Primaria de Valga (que abrangue tamén a Pontecesures) conta con 9.316 persoas asignadas, das cales 1.239 son menores de 14 anos, dispondo dun único posto de pediatría.
A este cadro de persoal xa axustado súmase que, durante o verán e os períodos de ausencias noutros centros, a única profesional dispoñible ten que asumir tamén a atención de menores procedentes de Padrón, Rois, Dodro e parte de Rianxo.
Desde o BNG rexeitan que se utilice a falta de profesionais como escusa recorrente e sinalan a política sanitaria do Partido Popular como responsable directa do debilitamento da Atención Primaria.
Reclamacións chave do BNG para o Centro de Saúde de Baño
- Cobertura do 100% das ausencias: Planificación anticipada de vacacións e baixas para evitar o colapso do servizo.
- Reforzo en Pediatría: Garantir a estabilidade na atención infantil sen asumir sobrecargas doutros concellos.
- Climatización urxente: Instalación dun sistema de aire acondicionado nas consultas traseiras do edificio, onde os episodios de intensa calor estival impiden traballar e atender en condicións dignas «Valga merece un Centro de Saúde con persoal suficiente. Defender a sanidade pública pasa por impedir que o seu deterioro se converta na norma», concluíu Fran Devesa, voceiro municipal do BNG.
