A alcaldesa de Lugo, Elena Candia, recibiu hoxe na Casa do Concello a representantes da organización colexial dos axentes comerciais con motivo dos actos de celebración do seu centenario.
Na recepción participaron Francisco Manuel Maestre Barrajón, presidente do Consello Xeral de Colexios de Axentes Comerciais de España; Ángel Carlos Rato, presidente do Colexio Oficial de Axentes Comerciais de Xixón; e Jaime Gueimonde Sierra, presidente do Colexio Oficial de Axentes Comerciais de Lugo.
Durante o encontro, a alcaldesa trasladoulles o recoñecemento do Concello a unha profesión estreitamente vinculada á actividade económica e comercial e á relación entre as empresas e a sociedade. O informe elaborado polo Consello Xeral define precisamente o axente comercial como un profesional que actúa como vínculo entre ambas partes, detectando necesidades e cambios no mercado e trasladándoos ás empresas.
“Celebrar cen anos é falar de persoas que souberon adaptarse aos cambios económicos, sociais e tecnolóxicos sen perder a esencia dunha profesión baseada na confianza, no coñecemento do mercado e no contacto directo coas empresas e coa cidadanía”, destacou Candia.
Cen anos tamén de historia en Lugo
O Colexio Oficial de Axentes Comerciais de Lugo constituíuse o 15 de novembro de 1926, sendo o seu primeiro presidente Vicente Rivas López. Apenas dous meses despois, o 24 de xaneiro de 1927, incorporouse Mercedes Fernández Legaspi, primeira muller colexiada en Lugo. Ao longo da súa historia, a entidade estivo presidida por nove persoas, contando ao actual presidente.
A entidade lucense foi medrando e adaptándose ao longo das décadas, pasando por diferentes sedes ata instalarse na súa actual localización da Avenida da Coruña.
Candia destacou “a capacidade dun colectivo que leva un século acompañando a evolución do comercio lucense, estando ao lado das empresas e adaptándose a cada nova realidade”.
Acto conmemorativo pola tarde
Os actos continuaron cun evento de celebración do centenario, no Círculo das Artes, que serviu para lembrar a traxectoria da organización colexial, recoñecer o traballo desenvolvido durante estes cen anos e poñer tamén a mirada no futuro da profesión.
O propio Consello Xeral sinalou entre os retos actuais a adaptación a un contexto marcado pola globalización, a liberalización dos mercados e os cambios tecnolóxicos, situando a formación continua como unha das claves para manter un alto nivel de profesionalización.
“Lugo é unha cidade cunha fonda tradición comercial e empresarial, e detrás desa historia hai tamén xeracións de axentes comerciais que contribuíron a abrir mercados, crear relacións e xerar oportunidades. Este centenario é unha boa ocasión para agradecerlles ese traballo e mirar xuntos cara aos próximos cen anos”, concluíu a alcaldesa.
