O Concello de Lugo acolle a presentación de Lugopoética 2026, unha publicación que dá voz á creación poética lucense

O salón de sesións da Casa do Concello acolleu este luns a presentación oficial de Lugopoética 2026, unha coidada publicación que recolle os contidos e as conversas poéticas desenvolvidas na sede da UNED en Lugo ao longo do primeiro semestre deste ano, baixo a coordinación e dirección do profesor e poeta Xosé Carlos Ulloa.

Durante o acto, a representación municipal ratificou o firme apoio do Concello a esta iniciativa, entendendo que a dinamización e a promoción da literatura e da poesía constitúen un piar fundamental do compromiso institucional coa cultura galega. Así mesmo, subliñouse a relevancia de habilitar espazos de encontro que permitan outorgar visibilidade ao talento dos creadores locais e achegar o xénero poético de preto á cidadanía.

Un escaparate para doce voces do panorama literario

Nado co claro obxectivo de pór en valor a rica tradición poética lucense, Lugopoética consolida un espazo de diálogo onde conviven tanto voces consagradas como novas firmas que destacan pola calidade da súa creación literaria en galego. Esta nova edición reúne a participación de doce poetas procedentes de diferentes puntos da xeografía galega, como Chantada, Castroverde, Sarria, Lugo, Paradela, Guitiriz, Cospeito e Corme. Como agasallo institucional, todas as persoas asistentes ao evento recibiron un exemplar gratuíto do libro.

Ademais da presenza de cargos institucionais, o acto contou coas intervencións do director dos encontros, Xosé Carlos Ulloa; do presidente de Egeria, Xulio Xiz; e dunha nutrida representación dos poetas protagonistas da obra: Diana Varela Puñal, Chelo Gayoso, Alicia Fernández, Elena Pérez, Eduardo Carreira, Ánxela Gracián, Anamar Fraga, Mariluz Balsa, Xosé Lois García e Ramón Rodríguez Porto.

Música en directo e respaldo institucional

A nota artística e sensible da xornada correu a cargo da nova flautista Angélica Darriba Fernández, de tan só 13 anos. Alumna das Escolas Músico Crisanto e integrante da Banda Sons e Soños, a moza puxo o acompañamento musical á frauta traveseira, pechando unha actuación coa que xa ten amenizado varios destes encontros poéticos previos.

Lugopoética é un proxecto que conta co patrocinio institucional do Concello de Lugo, a Xunta de Galicia e a UNED, mentres que a organización e coordinación executiva do evento correron a cargo de Egeria e Brandán Comunicación.