O Sindicato Nacional de CCOO de Galicia cuestiona o plan da Xunta para combater o suposto «absentismo» laboral. Faino á luz dos datos oficiais da Inspección de Traballo e Seguridade Social (ITSS), que recollen un total de 742 accidentes investigados en Galicia durante o ano 2025 e 2,9 millóns de euros en sancións propostas por estes sinistros, o que supón un incremento do 133,6 % respecto a 2024.
Ante esta situación, a organización sindical reclama deixar de criminalizar a quen enferma e priorizar a prevención de riscos laborais, xunto co reforzo do Sergas e da Inspección de Traballo para garantir a saúde e a seguridade da clase traballadora.
Un plan baseado nunha «premisa errada»
Para CCOO, os datos son «demoledores» e confirman que o Plan integral para a mellora da prevención, o benestar laboral e a reincorporación saudable ao traballo en Galicia (2026-2029) —impulsado pola Xunta co apoio da CEG e UGT— «partía dunha premisa errada e, polo tanto, non vai á raíz do problema».
O sindicato denuncia que o enfoque institucional distorsiona o concepto de «absentismo» para sinalar a quen está de baixa médica. O secretario de Saúde Laboral de CCOO, Armando Iglesias, amósase contundente: «A realidade das estatísticas desmonta o relato. Mentres se sinala as persoas traballadoras que enferman, as empresas galegas acumulan incumprimentos millonarios e os accidentes laborais mortais seguen sendo unha epidemia».
Máis de 700 accidentes e 48 vítimas mortais en 2025
O informe da ITSS inclúe a investigación de 742 accidentes de traballo (excluídos os in itinere), o que representa un aumento do 3,9 % respecto aos 714 de 2024. Por provincias, a distribución das investigacións foi a seguinte:
- A Coruña: 357
- Pontevedra: 225
- Lugo: 101
- Ourense: 59
Segundo datos do Instituto de Seguridade e Saúde Laboral de Galicia (ISSGA), 48 persoas perderon a vida en sinistros laborais na comunidade o ano pasado.
As investigacións amosan unha relación directa entre a sinistralidade e os incumprimentos das empresas: detectáronse 282 infraccións vinculadas a accidentes (un 23 % máis ca no exercicio anterior), o que derivou en propostas de sanción por case tres millóns de euros.
Con estes datos, Galicia converteuse na comunidade onde máis aumentou o importe das sancións a empresas nesta materia. Ademais, situouse como a quinta autonomía con máis infraccións (só por tras de Cataluña, Andalucía, Valencia e Madrid) e a sexta en accidentes investigados.
Máis de 4 millóns en sancións de prevención
Máis alá dos accidentes xa producidos, a ITSS realizou en Galicia máis de 31 000 actuacións preventivas que deron lugar a:
- 15 285 requirimentos ás empresas.
- 1 125 infraccións, con sancións que superan os catro millóns de euros.
- 302 propostas de recarga de prestacións tras comprobarse a falta de medidas de seguridade obrigatorias.
«É obsceno que se criminalice a quen enferma ou sofre un accidente cando os datos demostran que as empresas galegas non cumpren coa súa obriga de protexer a vida do seu persoal», subliña Iglesias.
A fraude está nos incumprimentos empresariais
Para CCOO, «a fraude non está nas persoas traballadoras, senón nas empresas». O sindicato lembra que, no conxunto do Estado, as empresas acumulan máis de 30 millóns de euros en sancións por falla de prevención, ademais de sumaren arredor de 2,54 millóns de horas extra non pagadas á semana (case 130 millóns ao ano).
En contraste, o absentismo inxustificado real apenas representa o 0,13 % da xornada laboral (uns 12 minutos ao mes), segundo a Enquisa Trimestral de Custo Laboral. «Quen é o verdadeiro defraudador do sistema?», cuestiona o responsable de Saúde Laboral, lembrando que moitas empresas deben miles de euros por non pagar horas extraordinarias, non cotizar ou non garantir a seguridade.
As causas reais das baixas médicas
CCOO critica que o plan da Xunta equipare erroneamente as ausencias lexítimas e xustificadas (incapacidades temporais, maternidade, permisos, formación ou crédito sindical) co absentismo. «Exercer un dereito non é absentismo», remarca Iglesias.
O informe da ITSS confirma que a maioría das baixas teñen a súa orixe nas propias condicións de traballo:
- O 69 % do persoal está exposto a movementos repetitivos.
- O 54 % traballa en posturas forzadas.
- O 37 % manipula cargas excesivas.
Por este motivo, a organización lamenta que UGT asinase este documento co goberno galego e a patronal CEG, especialmente ás portas da folga xeral convocada para o vindeiro 11 de novembro para defender a saúde laboral e rexeitar as pretensións das mutuas.
Críticas á estratexia do PP
Finalmente, o sindicato dirixe a súa mirada cara ao líder do PP, Alberto Núñez Feijóo, quen recentemente presentou o seu ‘Contrato con España’ defendendo a sanidade pública e o «respecto á xente».
Para CCOO resulta contraditorio que, mentres mantén ese discurso, apoie o modelo aplicado en Galicia, o cal considera deseñado para «afondar na criminalización das persoas en baixa médica e no cuestionamento dos profesionais sanitarios». «Se Feijóo cre de verdade no respecto á xente e na sanidade pública, debería denunciar o que o seu partido fai en Galicia e incluír no seu programa un plan de reforzo do sistema sanitario. Ao non facelo, lexitima un modelo que trata as persoas enfermas como sospeitosas e pon os intereses empresariais por riba da saúde e da dignidade», conclúe a organización sindical.
