O PSdeG-PSOE realizou este domingo a súa tradicional ofrenda floral no cemiterio municipal de San Amaro, na Coruña, para render homenaxe a Ramón Maseda, compañeiro da agrupación socialista coruñesa que foi asasinado en agosto de 1936 pola represión franquista. A comitiva estivo integrada por Obdulia Taboadela, candidata socialista pola provincia da Coruña; Inés Rey, secretaria xeral da Agrupación Socialista coruñesa e alcaldesa da cidade; e diversos membros da Executiva Local.
Trala colocación de rosas vermellas sobre a tumba e a garda dun respectuoso minuto de silencio, Obdulia Taboadela trasladou o seu «máis sentido pésame» ás familias e amizades das vítimas do recente accidente ferroviario.
Durante a súa intervención, Taboadela puxo en valor a importancia de preservar a memoria histórica: «É importante recordar as vítimas do franquismo. Foron vítimas cuxo único delito foi a defensa a ultranza dos valores democráticos«, sinalou, advertindo ademais de que nun contexto global de retroceso democrático resulta imperativo reivindicar a quen entregou a súa vida dicindo «democracia si, tiranía non».
