A plataforma, formada por colectivos e veciñanza da cidade, presentouse publicamente en defensa dun modelo habitacional alternativo ao actual e anuncia unha nova asemblea o xoves 19 de novembro no CS Madia Leva.
Máis de 2.000 persoas participaron na manifestación pola vivenda celebrada este mércores en Lugo e convocada pola Plataforma Lugo pola Vivenda Digna. A marcha partiu ás 18:00 horas desde o edificio multiusos da Xunta de Galicia e rematou fronte á Casa do Concello.
Esta mobilización serviu tamén como presentación pública da nova plataforma, un espazo que agrupa colectivos sociais e veciños e veciñas da cidade para reclamar un cambio de rumbo. O colectivo defende un modelo que entenda o acceso á vivenda como un ben fundamental e non como un simple activo financeiro suxeito á especulación.
Éxito de participación e apoio de colectivos sociais
A Plataforma Lugo pola Vivenda Digna foi a encargada de convocar e organizar unha protesta á que tamén se sumaron outras entidades sociais da cidade. Desde a organización valoran a resposta cidadá como un rotundo éxito e confían en que este respaldo nas rúas se traduza nunha maior implicación nas vindeiras reunións de traballo.
Vixilancia sobre os proxectos urbanísticos en San Fiz e o Sagrado Corazón
Vixilancia sobre os proxectos urbanísticos en San Fiz e o Sagrado CorazónO traballo da entidade parte de analizar en profundidade a realidade do mercado inmobiliario e do alugueiro en Lugo. Entre as súas liñas de actuación inclúese o seguimento detallado dos proxectos urbanísticos que se están a executar na actualidade en San Fiz e no PIA do Sagrado Corazón.
A partir deste coñecemento da realidade local, o colectivo pretende formular e impulsar medidas concretas en materia de vivenda para garantir o dereito a un fogar na cidade.
Próxima cita: asemblea aberta no Centro Social Madia Leva
A Plataforma continuará coa súa folla de ruta nas vindeiras semanas para consolidar o movemento veciñal. A seguinte convocatoria será o xoves 19 de novembro, ás 19:30 horas, no Centro Social Madia Leva, onde se celebrará unha nova asemblea aberta á participación de toda a cidadanía.
