Do 12 ao 18 de novembro, as redes sociais da Unión de Federacións Deportivas Galegas presentan cada día un bloque de modalidades e convidan a cidadanía a dar o primeiro paso no deporte federado.
A Unión de Federacións Deportivas Galegas (UFEDEGA) estrea hoxe «AQUÍ FALTAS TI», unha campaña en redes sociais que pon o foco nas 59 federacións deportivas galegas. O obxectivo é que calquera persoa, sexa cal sexa a súa idade ou nivel, atope unha modalidade á súa medida e saiba como empezar. A campaña está patrocinada pola Consellería de Presidencia, Xustiza e Deportes da Xunta de Galicia.
A campaña arrinca cun vídeo de presentación que percorre todas as modalidades federadas a través de imaxes de deportistas galegos e galegas. Nel aparecen referentes como a baloncestista Blanca Millán, a futbolista Teresa Abelleira, a xogadora de balonmán Alicia Fernández, a saltadora Ana Peleteiro, a regatista Támara Echegoyen, a piragüista Antía Jácome e o piloto de motocross Jorge Prado. Xunto a eles, outros nomes do deporte galego como o xadrecista Iván Salgado, o tenista Martín de la Puente, o golfista Santiago Tarrío ou a judoca Laura Martínez Abelenda.
A mensaxe é directa: no deporte federado galego hai sitio para todas as persoas. Cada peza remite a ufedega.gal/federacions, onde se poden consultar os datos de contacto de cada federación.
Durante sete días, as redes de UFEDEGA publican unha peza principal por bloque temático e unha story por cada federación, co seu logotipo:
| Día | Bloque | Modalidades |
| Xoves 12 | Deportes de equipo | Baloncesto, balonmán, béisbol e sofbol, fútbol, hóckey, rugby e voleibol |
| Venres 13 | Deportes de auga | Actividades subacuáticas, esquí náutico, motonáutica, natación, piragüismo, remo, salvamento e socorrismo, surf e vela |
| Sábado 14 | Raqueta, precisión e estratexia | Bádminton, billar, bolos, deporte autóctono, golf, pádel, pelota, petanca, squash, tenis, tenis de mesa, tiro ao voo, tiro con arco, tiro olímpico e xadrez |
| Domingo 15 | Contacto e forza | Boxeo, esgrima, halterofilia, judo e D.A., karate e D.A., kickboxing, kung-fu, loita e taekwondo |
| Luns 16 | Aire e natureza | Aeronáutica, caza, colombicultura, colombofilia, deportes de inverno, espeleoloxía, hípica, montañismo, orientación e pesca e casting |
| Martes 17 | Rodas e motor | Automobilismo, ciclismo, motociclismo e patinaxe |
| Mércores 18 | Movemento e multidisciplina | Atletismo, baile deportivo, deporte adaptado, tríatlon e péntatlon moderno e ximnasia |
«Queremos que quen non practica deporte, ou quen o deixou, sinta que hai unha federación esperando por el ou por ela. Galicia ten deportistas de primeiro nivel en case todas as modalidades, e todos empezaron un día nun clube federado», sinala Javier Nogueira, Presidente de UFEDEGA. «Esa é a forza do deporte federado galego.»
As pezas pódense seguir nos perfís de UFEDEGA en Instagram, Facebook e X co cancelo #AquíFaltasTi. As federacións participantes comparten tamén o contido nas súas propias contas.
