A proba terá lugar o domingo 24 de novembro, con saída desde a contorna do pavillón polideportivo municipal, na rúa dos Ancares.
Xa está aberto o prazo de inscrición para a carreira popular de Novo Mesoiro, que marcará o peche desta undécima edición do circuíto Coruña Corre, unha iniciativa xa clásica no calendario deportivo anual da cidade e coa que o Concello dinamiza, ano tras ano, a programación de actividades de ocio nos barrios.
A proba terá lugar o domingo 24 de novembro e, como xa é habitual, están previstos diversos percorridos tanto para as e os participantes na categoría absoluta como para as persoas inscritas en categorías inferiores (sub-18, sub-16, sub-14, sub-12, sub-10 e peques).
No caso da categoría absoluta está previsto un trazado de 5,5 quilómetros, case na súa totalidade sobre asfalto, con saída ás 10.00 horas desde a contorna do polideportivo municipal de Novo Mesoiro, na rúa dos Ancares. O percorrido seguirá, xa a continuación, ao longo da avenida de Novo Mesoiro, as rúas Fragas do Eume e Ribeira Sacra, para enfilar posteriormente polas sendas peonís lindeiras á rúa Illa de Sálvora e volta ás inmediacións do pavillón do barrio.
As saídas correspondentes ás categorías inferiores sucederanse de forma progresiva tras a entrega de premios ás e aos competidores na proba absoluta, que terá lugar ás 11.00 horas.
O concelleiro de Deportes, Manuel Vázquez, animou a cidadanía a tomar parte na proba, «que pon o peche final a unha edición de Coruña Corre que amosou, unha vez máis, que os eventos deportivos a pé de rúa contribúen a lles dar vida aos barrios da cidade e tamén a promover os valores saudables de forma interxeracional, en todos os tramos de idade». Coruña Corre é unha das iniciativas impulsadas polo Goberno de Inés Rey para promover a popularización do deporte e os hábitos de vida saudable.
Neste sentido, as persoas interesadas en tomar parte na carreira popular de Novo Mesoiro xa se poden inscribir en liña a través da web oficial de Coruña Corre, premendo nesta ligazón. O custo da participación é de 3 euros na categoría absoluta, de balde nas categorías inferiores.
A data límite de inscrición será o domingo 17 de novembro, unha semana antes da proba.
Servizo de gardarroupa e duchas no pavillón polideportivo municipal
Cómpre lembrar que, como en todas as carreiras do circuíto Coruña Corre, o Concello habilitará un servizo de gardarroupa e outro de duchas, que estará dispoñible no polideportivo municipal de Novo Mesoiro.
Ademais, as persoas participantes na proba disporán de auga e avituallamento sólido na súa chegada á meta.