Reclamará transferir á Galiza as competencias, infraestruturas e recursos materiais na Galicia da UNED, da UIMP e das entidades dependentes do CSIC.
O deputado BNG no Congreso, Néstor Rego, defenderá a vindeira semana unha iniciativa na Comisión de Ciencia e Universidades para garantir o uso do galego na UNED e arbitrar medidas necesarias para que facilite a distribución, corrección e cualificación dos exames en galego, así como adoptar as medidas necesarias para que os materiais e contidos se encontren dispoñíbeis nos distintos idiomas oficias do Estado distintos do español. Así mesmo, a vindeira cuarta feira, 21 de maio, Rego demandará a transferencia á Galiza a transferencias das competencias, infraestruturas e recursos materiais na Galiza da UNED, da UIMP e das entidades dependentes do CSIC.
Coa mirada posta no obxectivo de garantir aos galegos e galegas o uso da súa lingua, o Bloque Nacionalista Galego defenderá a necesidade de estabelecer os mecanismos necesarios que fagan cumprir unha das misións fundamentais na UNED: “o apoio ás linguas e culturas do Estado español”. Por este motivo, o deputado do BNG entende que “é de xustiza” que os exames que se realizan na Galiza na UNED poidan ser realizados, cando menos, en calquera das dúas linguas oficiais e mesmo avanzar na normalización de contidos, materiais e clases impartidas nas distintas linguas do Estado diferentes do español.
Por este motivo, Rego defenderá a necesidade de garantir os dereitos lingüísticos dos galegos e galegas asegurando o dereito a realizar os exames e probas das distintas materias de graos e mestrados impartidos na UNED en galego de seren a súa elección, no mínimo, nos centros sitos na Galiza, así como arbitrar as medidas necesarias para que se facilite a distribución, corrección e cualificación dos exames en galego.
“O Goberno tamén debe adoptar as medidas necesarias para que a páxina web da UNED, así como os materiais didácticos e contidos das materias se encontren dispoñíbeis nos distintos idiomas oficiais do Estado distintos do español ademais de en inglés” enfatiza Rego.
Transferir as competencias pendentes en materia de universidades
Paralelamente, na iniciativa tamén se defende a necesidade de avanzar na transferencia das competencias pendentes en materia de universidades, así, reclamará a transferencia a Galiza as competencias, infraestruturas e recursos da Universidade Nacional de Educación a Distancia (UNED), da Universidade Internacional Menéndez Pelayo(UIMP) e das entidades dependentes do Consello Superior de Investigacións Científicas (CSIC)”. A organización nacionalista defende a necesidade de avanzar nun modelo universitario e científico descentralizado e plenamente adaptado ao territorio e ás necesidades galegas.
