O domingo 1 de xuño, ás 12:30 horas, terá lugar a tradicional ofrenda floral no monolito que lembra, no Cemiterio de santo Amaro, ás vítimas da represión da folga xeral de maio de 1901 na Coruña.
A Federación Local Obreira da CGT da Coruña organiza para o vindeiro domingo, día 1 de xuño de 2025, ás 12:30 horas, no cemiterio de santo Amaro da Coruña, a tradicional ofrenda floral en lembranza dos obreiros e obreiras asasinadas, vítimas da represión da folga xeral (a coñecida como folga dos «consumeiros») que tivo lugar na cidade da Coruña os días 30 e 31 de maio e día 1 de xuño de 1901.
A homenaxe terá lugar no monolito que foi levantado por iniciativa das sociedades obreiras coruñesas e sufragado por subscrición popular no ano 1906.
Ao seu remate, farase outra ofrenda ante o conxunto escultórico situado na Avenida de Navarra en lembranza de toda as vítimas da represión franquista.
