A noticia do falecemento de Manuel Lourenzo, figura senlleira das Letras Galegas e veciño da comarca, causou unha profunda dor en toda a Mariña. Múltiples manifestacións de pésame sucedéronse ao longo do día para lamentar a perda deste dramaturgo, director e actor.
O BNG de Alfoz-Valadouro e A Mariña amosan o seu pesar
Desde a Asemblea Local do BNG Alfoz-Valadouro, a súa responsable, Beatriz Álvarez Sixto, quixo destacar a importancia de Manuel Lourenzo, quen «sempre tivo presente a súa orixe valadouresa e que ata o último momento mantivo firme a súa querenza e compromiso coa súa terra natal». Álvarez Sixto subliñou o seu legado de «coherencia» e «numerosas obras a través das cales defendeu os principios e valores dos que fixo gala durante toda a súa existencia».
En termos semellantes, o responsable comarcal do BNG na Mariña, Antonio Veiga Outeiro, considerou a morte de Manuel unha «gran perda para o país». Veiga salientou a súa figura central no teatro e o audiovisual galego, así como o seu compromiso coa lingua, a cultura e «todas as causas xustas». En nome do BNG, trasladou o seu máis sentido pésame á familia, amigos e, especialmente, a todas as persoas e colectivos do Val que traballaron con el.
As manifestacións de loito conclúen cun emotivo «Que a terra lle sexa leve!», un desexo que resume o sentimento de toda a comarca por un dos seus fillos máis queridos.
