O secretario xeral do PSdeG, José Ramón Gómez Besteiro, esixiu a dimisión inmediata de Alfonso Rueda por «incompetencia» e «abandono de responsabilidades» ante a vaga de incendios que devastou Galicia este verán. Segundo Besteiro, Rueda fracasou na prevención, na extinción e na coordinación, xa que ten «todas as competencias na loita contra os incendios».
O líder socialista comezou a súa intervención no Parlamento cunha lembranza ás vítimas e un recoñecemento aos servizos de emerxencias e voluntarios. A continuación, foi contundente: «Señor Rueda, vostede fracasou. E unha evidencia que xa non é discutible. Non gobernou. Vostede debe marcharse. Galicia non pode permitirse unha nova traxedia».
Acusacións de Besteiro a Rueda
- Tardanza e desatención: Besteiro denunciou que o presidente da Xunta tardou doce días en comparecer, a pesar de que Ourense «estaba en emerxencia 2» e había bombeiros hospitalizados.
- Seguidismo de Feijóo: O líder socialista acusou a Rueda de actuar baixo a tutela de Núñez Feijóo, poñendo os intereses de Galicia por debaixo dos do seu partido. «Papá Feijóo fala en Galicia e o día 15 todas as CCAA do PP piden máis medios ao Goberno. Iso é poñer a Galicia por debaixo de Feijóo», criticou.
- Abandono do rural: Besteiro vinculou a gravidade dos lumes ao «abandono histórico do rural», con montes sen xestión e núcleos rurais cada vez máis desatendidos. «A Galicia interior morre, porque a deixan morrer», afirmou.
- Política de recortes e falta de prevención: O voceiro socialista lembrou que a Xunta non aplicou 123 medidas aprobadas no Parlamento en 2018 para a prevención de incendios. Tamén acusou o goberno de ter «menos brigadistas, prazas sen cubrir e millóns bloqueados» que poderían destinarse á prevención.
- Manipulación e menosprezo dos danos: Besteiro criticou as declaracións de Rueda minimizando os danos, dicindo que a maior parte do que ardera era «matogueira» ou «pedras». Tamén acusou á Xunta de usar a TVG como «medio particular do PP» en lugar de como servizo público.
- Rexeitamento de fondos: O socialista reprochoulle a Rueda que rexeitase a condonación de 4.010 millóns de euros de débeda que poderían usarse para a prevención. Unha decisión que, segundo Besteiro, é un simple «seguidismo» de Feijóo.
Besteiro concluíu que Rueda «intentou enganar coa prevención, non soubo xestionar a crise e utilizouna para os mandatos do seu partido». Rematou cunha clara mensaxe ao presidente: «Máis prevención, máis brigadistas e menos cavar fosas».
