O Campionato de España de Barco Dragón (200 metros), pechou este domingo en Lugo cun balance de «éxito deportivo e social», en palabras do deputado de Formación, Ensino e Economía do Coñecemento, Miguel Fernández. A competición, que contou cun investimento provincial de 25.000 €, reuniu durante toda a fin de semana a preto de 800 deportistas procedentes de 29 clubs de toda España.
Durante a última entrega de premios, Fernández destacou que o apoio da Deputación de Lugo a estas disciplinas responde a un compromiso firme cos valores de igualdade, inclusión e hábitos saudables. Así mesmo, o deputado puxo en valor a capacidade organizativa da provincia para acoller citas de ámbito nacional, subliñando o forte impacto económico que o turismo deportivo deixa no comercio e na hostalaría local.
