A vicepresidenta da Deputación de Pontevedra, Luisa Sánchez, participou en Vigo no acto de inauguración e presentación da XIII Conferencia Internacional ARVI sobre o Futuro da Pesca, organizada pola Cooperativa de Armadores de Pesca do Porto de Vigo.
Baixo o lema “A empresa pesqueira do futuro: investimento, innovación e relevo empresarial”, o encontro reúne representantes da administración, expertos e profesionais do sector para analizar os principais retos aos que se enfrontará a actividade pesqueira nos vindeiros anos.
Luisa Sánchez puxo en valor a importancia de que Vigo siga sendo un punto de encontro para falar de pesca, un sector fundamental para a cidade. A xornada aborda cuestións como o financiamento, a competitividade da pesca, os novos modelos de empresa e a xestión do talento, nun momento marcado polos retos da modernización e do relevo xeracional.
