A seis semanas das eleccións xerais do 29 de novembro, a secretaria de Organización do PSdeG, Lara Méndez, aproveitou este domingo o Día do Veciño de Lugo para chamar a defender nas urnas os dereitos “que tanto custou conseguir”.
A cita, que celebra a súa XXIV edición no Pazo de Feiras e Congresos da man da Federación de Asociacións de Veciños da Provincia de Lugo Lucus Augusti, reuniu, segundo o PSOE, a unhas 5.000 persoas de toda a provincia —algo máis de 1.000, segundo os medios de comunicación lucenses—. O evento serviu a Méndez para facer unha lectura política de cara á campaña que se aveciña. «Os dereitos que hoxe temos non caeron do ceo; conseguíronse porque a xente se organizou e se mobilizou, como fai o movemento veciñal. O que queren o PP e Vox é recortalos, e xa nin se molestan en agochalo, porque gobernan para os seus amigos e non para a maioría da xente», afirmou.
A mensaxe enlaza co acto que o PSOE celebrou onte en Fuenlabrada (Madrid), xusto despois de que o Comité Federal ratificase por unanimidade as candidaturas ao Congreso e ao Senado e proclamase a Pedro Sánchez candidato á Presidencia do Goberno. Baixo o lema «La fuerza de la gente», Sánchez puxo as pensións no centro do discurso, advertiu a PP e Vox de que non se tocan e reafirmou que o seu Goberno as revalorizará co IPC.
O presidente situou tamén a vivenda como outra das grandes causas desta xeración, un testemuño que Méndez recolleu desde Lugo. «Onte fixéronse en Fuenlabrada declaracións moi claras e quero repetilas aquí, entre veciños e veciñas: as pensións non se tocan, a vivenda ten que ser un dereito e os servizos públicos non se negocian«.
Segundo a dirixente socialista, o que o PP e Vox deixaron ver nas últimas semanas desmonta calquera intento posterior de matización. Lembrou que o pasado 2 de outubro votaron no Congreso, xunto con Junts, en contra dos decretos de vivenda —coñecidos como decretos Maricarmen—, que protexían as persoas vulnerables dos desafiuzamentos e prorrogaban os contratos de aluguer que vencen este ano. Poucos días despois, o deputado de Vox José María Figaredo defendeu transformar o sistema público de pensións nun modelo mixto de reparto e capitalización individual; mentres que o 10 de outubro Feijóo prometeu en Ifema «un Goberno que vos pida sacrificio», sen chegar a concretar nunca de que tipo de sacrificios fala.
«Unha muller de 87 anos morreu desafiuzada e o PP e Vox votaron que non a evitar que volva pasar. Despois falan de privatizar as pensións e de pedir sacrificio. Que digan a quen llo van pedir, porque á banca e aos fondos voitre seguro que non. Esa é a maneira que teñen de gobernar para os seus amigos«, sinalou.
Méndez lembrou que na provincia de Lugo non fai falta imaxinar o que supón esa palabra. «Aquí sabemos moi ben o que significa unha pensión, porque en moitísimas casas é o que sostén a familia enteira, e tamén sabemos o que pasou a última vez que gobernou o PP, con subas do 0,25 % ano tras ano mentres os prezos non paraban de subir. Garantir por lei que as pensións soben co IPC foi unha decisión política, e deixar de facelo sería outra», aseverou.
O movemento veciñal, argumentou, é a mellor proba de que os dereitos non chegan soos. «Foron as asociacións as que levaron aos concellos e á rúa a esixencia de máis sanidade e de mellores comunicacións para o rural, e iso non llo regalou niguén a Lugo. Os recortes nunca chegan co seu nome: chegan como unha consulta que tarda máis ou como unha persoa dependente que pasa meses agardando por unha axuda, e quen o sofre primeiro é sempre quen menos ten«, dixo.
Á festa achegouse tamén o alcalde de Vigo, Abel Caballero, a quen Méndez puxo como exemplo do que significa facer política desde o ámbito local. «Abel demostra cada día que a política útil se fai pisando a rúa e resolvendo o que de verdade lles preocupa aos veciños e veciñas. Esa é a política que o socialismo defende para Galicia e para España: a que goberna para a xente e non para uns poucos amigos«.
A secretaria de Organización do PSdeG, que estivo acompañada por varios concelleiros da corporación municipal, agradeceu o traballo da Federación Lucus Augusti e reivindicou o movemento veciñal como unha escola de democracia de proximidade. «Aquí está a forza da xente da que falabamos onte en Fuenlabrada, xente que se organiza e que non se resigna. O 29 de novembro esa forza ten que notar nas urnas«, concluíu.
