Os concelleiros da Agrupación Municipal do Partido Popular de Monforte de Lemos lamentan a postura de José Tomé e o seu equipo de goberno que onte votaron en contra de elaborar un plan de mellora da seguridade viaria nas proximidades dos centros educativos para mellorar a seguridade dos estudantes, sobre todo nas horas de entrada e saída.
A voceira popular de Monforte, Katy Varela, explica que esta proposta naceu froito de convesas con pais, nais e profesorado que reclaman elaborar este plan para dotar de maior seguridade ás contornas cos colexios, “un plan que debería de realizarse tendo en conta as opinións dos axentes implicados para coñecer con maior exactitude as inquedanzas e poder levar a cabo este plan da mellor maneira posible”.
Non se lle escapa a ninguén que os momentos de maior circulación do día danse coa entrada e saída dos nenos e xóvenes dos centros escolares e, dáse o caso, de que algúns centros, pola súa localización, non teñen maiores problemas, pero outros, por diversas circunstancias si.
“Pais e profesores trasladáronnos a importancia de que houbese máis vixilancia nas entradas e saídas dos centros, e incluso a posibilidade de reservar prazas de aparcamento para persoas con mobilidade reducida e aparcamentos para bicicletas, ademais de maior control de que se lle permita o estacionamento os autobuses e non estean as prazas reservadas a este efecto por outros vehículos”, indicou.
Finalmente, Katy Varela agarda que “José Tomé reaccione e teña a ben elaborar este plan xa que estamos a falar de mellorar a seguridade dos menores que acoden cada día ao seu centro educativo”.