O deputado electo do PSdeG, José Ramón Gómez Besteiro, é o único candidato que se presentou ás primarias para secretario xeral do PSdeG, logo de que hoxe ás 15,00 h. rematase o prazo para presentar precandidaturas.
De acordo co calendario aprobado na Executiva do PSdeG do pasado sábado, a partir de mañá ábrese o prazo de recollida de avais, que se prolongará ata o próximo 22 de marzo ás 12,00 h. O candidato terá que presentar como mínimo o 6 por cento dos en torno a 10.000 militantes con dereito a voto para que teña lugar a súa proclamación provisional.
A partir de entón abrirase un prazo de 4 días para a presentación de recursos e para a proclamación definitiva do candidato, co que o proceso quedaría pechado ata a celebración do Congreso Extraordinario convocado para o 27 de abril.