O texto aprobado en pleno destaca «o importante aforro» que supuxo para os galegos a entrada en vigor das bonificacións da AP-9 e aposta por continuar co «avance cara á gratuidade», tanto nas autoestradas de competencia estatal como nas de titularidade autonómica
A Deputación da Coruña insta á Xunta de Galicia a eliminar «de xeito inmediato» as peaxes nas autoestradas AG-55, entre A Coruña e Carballo, e AG-57, de Puxeiros a Val Miñor, ambas de titularidade autonómica.
O pleno da Deputación aprobou hoxe a moción presentada polo Partido Socialista instando ao goberno autonómico a suprimir as citadas peaxes. A iniciativa contou coas votos favorables de PSOE, BNG, e Alternativa dos Veciños e o voto en contra do Partido Popular.
Durante o debate, o portavoz do Partido Socialista, Bernardo Fernández, destacou os esforzos do Goberno Central na ampliación das bonificacións na AP-9, iniciadas en 2021, e aposta por continuar co «avance cara á gratuidade», tanto nas autoestradas de competencia estatal como nas de dependencia autonómica.
No relativo a AP-9, o texto da moción aprobada hoxe polo pleno apoia a súa transferencia a Galicia e aposta polo avance cara a gratuidade para «corrixir a nefasta decisión do Goberno do PP de Aznar, co silencio cómplice da Xunta de Galicia, de castigarnos con peaxes na AP-9 ata o ano 2048».