A obra, que comezará ás 21.00 horas, está protagonizada por Marián Bañobre e Isabel Risco
‘O furancho’ de Ibuprofeno Teatro, con Marián Bañobre e Isabel Risco, de balde o mércores 5 de xullo ás 21.00 h no auditorio do Centro Ágora.
O servizo de Promoción da Lingua do Concello da Coruña, coa colaboración do programa FalaRedes, programa ‘O furancho’, unha comedia premiada nos María Casares e interpretada por Marián Bañobre e Isabel Risco, escrita e dirixida por Santiago Cortegoso coa produción de Ibuprofeno Teatro.
Os e as amantes do teatro teñen unha cita no Centro Ágora para gozar da obra ‘O furancho’, unha comedia onde se mesturan as tendencias máis actuais do culto á beleza e os costumes máis tradicionais nunha histriónica actuación ambientada nun deses lugares míticos de Galicia, un furancho.
Dúas mulleres, interpretadas por Isabel Risco e Marián Bañobre encarnan a tradición que perdura dentro dos tempos máis modernos, cheos de novas tecnoloxías e culto ao corpo, e que loitarán por conseguir, dentro destes novos tempos, chegar ás súas metas.
A obra representarase o mércores 5 de xullo ás 21.00 horas. A entrada é de balde ata completar a capacidade do recinto. Pídese puntualidade, xa que unha vez que comeza o espectáculo non se permitirá acceder á sala.
