A Fiscalía constatou, tras denuncias veciñais e ecoloxistas, que se habían colmatado varios quilómetros de leito con residuos mineiros da louseira «O Poltrón»
O Xulgado de Primeira Instancia e Instrución N.º 8 de Ponferrada chamou a declarar na súa condición de imputados ao alcalde de Oencia Arsenio Pombo Ovide e ao empresario que está detrás da polémica canteira de lousa «O Poltrón», no monte comunal de Gestoso.
Tras numerosas denuncias de colectivos veciñais e ecoloxistas, a Fiscalía viu indicios de posibles delitos contra o medio ambiente e os recursos naturais, ao constatar o equipo especializado do SEPRONA que os residuos mineiros han colmatado varios quilómetros de leito. Isto ocorreu a pouca distancia do Lugar de Importancia Comunitaria de Ribeiras do Río Sil e afluentes, e a tan só 500 metros do Lugar de Importancia Comunitaria Os Ancares-Courel, xa en Galicia e coa consideración de Zona de Especial Protección para o oso pardo.
A explotación funcionou desde 2006 carecendo de proxecto de restauración, licenza de actividade e de obras, concesión de aproveitamento de auga nin autorización de verteduras. Durante máis de 15 anos funcionou sen Autorización de Licenza Ambiental de ningún tipo, sen que desde o Concello paralizase a actividade a pesar de numerosas denuncias.
Como consecuencia da falta de control, a explotación ocupou completamente as cabeceiras do río Gestoso e do rego Caborco de Mazales e os seus residuos alteraron a rede hidrolóxica superficial, levando á Confederación Hidrográfica do Miño-Sil a incoar varios expedientes sancionadores. A raíz das denuncias veciñais e actuación da Fiscalía, hai uns meses tamén o Servizo de Industria da Junta de Castilla y León iniciou expediente sancionador por unha infracción grave derivada da falta de mantemento e conservación da explotación.
«Non se trata dun caso illado», desde Ecoloxistas en Acción alertan que o caso de «O Poltrón» non é unha excepción, citando outros exemplos como a louseira Nano, situada a escasa distancia da anterior e a tan só 500 metros do núcleo de Arnado, que leva máis de 12 expedientes sancionadores da Confederación Hidrográfica por vertedura de residuos e outras infraccións, acumulando residuos mineiros de forma ilegal en pleno LIC de Ribeiras do Río Sil.
Neste caso, a explotación abandonouse en 2020 sen ningún tipo de restauración. Por outra banda, as canteiras «Mesa de Reis» e «Texeiras» tamén se autorizaron sen unha avaliación sobre os seus impactos en Rede Natura 2000, a pesar de estar a poucos metros do Lugar de Importancia Comunitaria Os Ancares-Courel, afectando no primeiro caso á Devesa do Cervo, no Concello de Quiroga, e en segundo ao do Pico de Montouto, un dos puntos máis altos da Serra do Courel a 1541 metros de altitude.