Tras as xornadas de folga convocadas pola sección sindical de UGT no aeroporto de Santiago de Compostela, nos servizos de asistencia en rampa e pasaxe de Iberia, celebrouse onte unha reunión crucial coa empresa para abordar o tema da carga de traballo que o persoal está a soportar, motivo polo cal se convocou a devandita folga
Para UGT, as mobilizacións deron lugar a avances significativos, así conseguiuse o compromiso por parte da empresa de levar a cabo as transformacións a tempo completo do persoal a tempo parcial nos aeroportos con licenza, tal e como se negociou no acordo de garantías. Ademais, estableceuse o compromiso de que estas transformacións se fagan efectivas antes da subida de actividade prevista para o verán.
É importante destacar que UGT foi a única forza sindical involucrada neste proceso, liderando as negociacións en beneficio dos traballadores e traballadoras do aeroporto.
Ademais, na xuntanza de onte as partes acordaron emprazarse a unha próxima reunión a semana que vén para continuar traballando, non só nesta liña, senón tamén na necesidade de cubrir a carga de traballo de Santiago con máis contratacións se fose necesario.
A sección sindical de UGT valora positivamente os avances logrados ata o momento e reafirma o seu compromiso cos traballadores e traballadoras do aeroporto compostelá. Ademais, manterase vixiante e activa en futuras negociacións para garantir condicións laborais xustas e equitativas.
