Este centro lucense oferta os ciclos medios de Formación Profesional Dual Intensiva de Produción Agroecolóxica e de Aproveitamento e Conservación do Medio Natural e os estudantes interesados aínda poden presentar a súa solicitude.
O prazo para matricularse nos graos medios do Centro de Formación e Experimentación Agroforestal “Pedro Murias”, situado na localidade lucense de Ribadeo e dependente da Consellería do Medio Rural, segue aberto. Este centro lugués oferta o ciclo medio de Formación Profesional Dual Intensiva de Produción Agroecolóxica focalizado en fundamentos agronómicos e zootécnicos, a plantación de cultivos ecolóxicos e en principios de sanidade vexetal. Os estudantes que cursen este grao recibirán nocións sobre infraestruturas e instalacións agrícolas; así como en produción gandeira e vexetal de xeito ecolóxico. Así, o alumnado deste ciclo poderá traballar nos eidos da agricultura, avicultura, cría de gando ou produción ecolóxica.
O Pedro Murias conta tamén co grao medio de Aroveitamento e Conservación do Medio Natural, que se centra en cuestións silvícolas, como as instalacións forestais ou a sanidade vexetal. Ademais, impártense materias relacionadas coa conservación de especies cinexéticas e piscícolas, así como as nocións necesarias sobre control fitosanitario. Os seus estudantes gozan dun amplo abano de saídas profesionais, como son, entre outras, o de especialista en traballos de repoboación e tratamentos silvícolas, motoserrista, traballador especializado en inventario, seguimento e adecuación dos hábitats forestais ou auxiliar de traballos de control de depredadoras e especies invasoras.
Formación práctica remunerada
Cabe sinalar que nestes ciclos, ao formar parte da modalidade Formación Profesional Dual intensiva, os estudantes reciben formación teórica no centro educativo e práctica -remunerada- nun centro de traballo. Isto favorece a súa inserción laboral, xa que ao rematar o ciclo o estudante contará con experiencia previa.
Aquelas persoas interesadas en matricularse poderán solicitar máis información na web do centro ou no número de teléfono: 982 828 552.