A Deputación da Coruña destina 175.000 euros para apoiar a 49 deportistas de alto nivel da provincia

A atleta ribeirense Ana Peleteiro, o boxeador coruñés Emmanuel Reyes, medalla de bronce en París, a lanzadora de peso mugardesa Belén Toimil, o arqueiro pontés Miguel Alvariño, o nadador Jacobo Garrido Brun ou o noiés Caetano Horta, entre os bolseiros de Deportes da Deputación deste ano.

A Deputación da Coruña, na súa labor de  apoio ao deporte coruñés, vén de publicar a concesión definitiva de 49 bolsas deportivas de 3.500 euros destinadas a deportistas da provincia que destacan en competicións federadas a nivel rexional, nacional e internacional. 

Entre as 49 persoas bolseiras figuran deportistas dun amplo abano de disciplinas deportivas: atletismo, piragüismo, remo, vela, natación, boxeo, taekwondo, judo, esgrima, tenis de mesa, badminton, halterofilia, tiro con arco ou triatlón.

O presidente da Deputación, Valentín González Formoso, afirmou que “ademais de premiar o esforzo e a excelencia dos deportistas coruñeses, a Deputación quere colaborar con elas e eles para que podan desenvolver todo o seu potencial, ter acceso á mellor preparación e competir ao máis alto nivel”. 

“As bolsas da Deputación pretenden ser unha axuda para que estes deportistas  sigan colleitando éxitos para o deporte coruñés”, apuntou o presidente da institución provincial.

Tamén o deputado responsable da área de Deportes, Antonio Leira, destacou a importancia destas axudas “para apoiar o traballo diario das persoas deportistas da provincia e darlles a oportunidade de continuar perfeccionando a súa práctica e de participar en competicións do máis alto nivel, incluso nos Xogos Olímpicos, como acabamos de ver en París”.

O deputado sinalou que entre os bolseiros se atopan algúns dos nosos atletas olímpicos e principais talentos deportivos da provincia nas diferentes disciplinas deportivas como a atleta ribeirense Ana Peleteiro, o boxeador coruñés Emmanuel Reyes, gañador da medalla de bronce en París, a lanzadora de peso mugardesa Belén Toimil, o arqueiro pontés Miguel Alvariño, o nadador Jacobo Garrido Brun ou o noiés Caetano Horta en remo. 

Máis bolsas e máis dotación económica

Leira destacou que o goberno de Valentín González Formoso incrementou nos últimos anos tanto o número como a contía das bolsas: “pasamos de 30 bolsas de 2.500 euros a 49 bolsas de 3.500 euros”, afirmou o deputado, que considerou que este apoio “evidencia o compromiso da Deputación cos nosos e as nosas deportistas e a nosa aposta para axudarlles a situar o deporte coruñés á vangarda do deporte galego”. Ademais, ampliouse tamén o rango de idades, permitindo que os deportistas de ata 32 anos podan participar na convocatoria.

As bolsas divídense en catro categorías: