Sofía Toro, Almudena Quereda, Irene Martínez e o adestrador do Hockey Club Coruña feminino, Stanis García, contarán as súas experiencias nun encontro aberto ao público.
A Deputación da Coruña organiza este xoves 6 de marzo, a partir das 19 horas na Sala Paideia da Coruña (praza de María Pita) a segunda edición da Xornada sobre a brecha de xénero no deporte. Un encontro gratuíto e aberto ao público no que se busca analizar e debater sobre as desigualdades de xénero que persisten neste ámbito.
O evento enmárcase nos actos do 8M, Día Internacional da Muller, e reunirá a destacadas deportistas da provincia para abordar retos e propostas de mellora na igualdade de oportunidades entre mulleres e homes.
A mesa redonda estará moderada polo xornalista deportivo Alfonso Hermida e centrada en diferentes aspectos da fenda de xénero, promovendo un espazo para a reflexión e intercambio de ideas.
Entre as participantes figuran a campioa olímpica de vela, Sofía Toro; a campioa de España de natación adaptada, Almudena Quereda; a campioa de España de Halterofilia, Irene Martínez, e o adestrador do equipo feminino do Hockey Club Coruña, Stanis García, que compartirán as súas experiencias e analizarás os desafíos actuais neste ámbito.
Ademais, destacarase a importancia de políticas públicas e accións concretas para reducir esta desigualdade. Con esta iniciativa, a Deputación reafirma o seu compromiso coa loita pola igualdade e a visibilización das barreiras que aínda persisten en determinados ámbitos da sociedade.
