O PP informou en rolda de prensa que o tenente de alcalde, Rubén Arroxo sacou onte do caixón CINCO DECRETOS que asinou, en ausencia do alcalde, autorizando o pago de máis de 60.000 € de sancións por verteduras contaminantes en distintos puntos do municipio.
Tres deles eran expedientes sancionadores por verteduras e incumprimentos ambientais cometidos entre 2021 e 2023, coincidindo coa etapa na que Miguel Fernández tiña a responsabilidade directa da área de Medio Ambiente. Os outros dous eran reclamacións do canon de control de verteduras. En todos os casos, a falta de actuación e resposta ante estes expedientes provocaron que se tramitasen por vía executiva, o que supón maiores custos para o Concello, incluíndo intereses de demora.
O PP pediu ao goberno local que dea explicacións do sucedido, que aclaren os motivos polos que estes expedientes acaban en vía executiva e as razóns polas que se agardou a que o alcalde estivera de viaxe para que Arroxo sacase estes decretos dun caixón e decidira o seu abono.
Cascada de incumprimentos de Miguel Fernández
Para os populares “o sucedido tamén é outro exemplo máis do dobre incumprimento do alcalde Miguel Fernández: por un lado, non tomou medidas para evitar os danos ambientais cando tiña a responsabilidade, e por outro, hoxe incumpre o prazo que deu” en alusión a que comprometeu, que o 15 de maio, estarían rematadas as obras de peonalización da rúa Montevideo. Os populares indicaron que a realidade é que a obra segue sen rematar polo que “a súa palabra vale pouco o nada”.
INFORMACIÓN CINCO DECRETOS:
Hai tres expedientes sancionadores: dous derivados de vertidos ilegais procedentes de lixiviados dun antigo vertedoiro clausurado e que afectaron ao cauce do río Penalba (Teixeiro); outro un vertido directo de augas residuais procedentes dun aliviadoiro dunha estación de bombeo municipal a un regato en Meilán.
Ademais súmanse dúas reclamacións do canon de control de vertidos pola urbanización Bellavista en Esperante, correspondentes aos anos 2021 e 2022.
Os feitos que provocaron estes expedientes sancionadores sucederon entre os anos 2021 ao 2023 un periodo no que Miguel Fernández tiña responsabilidades directas na área de Medio Ambiente.
