Despois do éxito do arranque do ciclo especial polo X aniversario do proxecto Guido Guía o pasado 9 de agosto, con 52 persoas de toda Galicia e outras procedencias, o vindeiro sábado 23 terá lugar o segundo capítulo da famosa serie de paseos guiados do recoñecido turismólogo lucense Guido Álvarez Parga.
Nesta ocasión o itinerario centrarase na contorna do río Fervedoira, un dos ríos lucenses menos coñecidos polo gran público pero sen embargo cun inmenso atractivo a nivel etnográfico, cultural e sobre todo natural. “A senda do Fervedoira” é o título do percorrido.
A actividade comezará ás 11 da mañá no Parque Rosalía de Castro, o prezo será de 8 € por persoa (desconto do 50% para menores de 18 anos, e gratuidade para menores de 2) e as inscricións poden facerse a través do correo electrónico guidoguiaturismo@gmail.com.
