A Fundación Artesanía de Galicia organiza por quinto ano consecutivo o encontro Artesanía de Galicia na Ribeira Sacra, unha iniciativa para divulgar os oficios tradicionais, impulsar a comercialización do produto artesán galego e consolidar a marca Artesanía de Galicia. O evento celebrarase este sábado, 23 de agosto, no Santuario de Nosa Señora de Cadeiras, en Sober, en horario de 11:00 a 21:00 horas.
19 obradoiros e unha oferta diversa
Esta edición contará coa participación de 19 obradoiros da marca Artesanía de Galicia, que amosarán os seus traballos en olería, xoiería, cerámica, xoguetes, bixutería, manipulación de papel e complementos de moda.
Entre os expositores, destacan os obradoiros locais como Alfarería Elías de Gundivós (Sober), Enxógate (Quiroga) e Mimacuir (Castelo, Taboada). O resto dos participantes proceden de diferentes puntos de Galicia, enriquecendo a variedade da mostra.
Talleres e música para todos os públicos
O encontro tamén ofrecerá unha programación de obradoiros gratuítos e abertos a todos os públicos, que se desenvolverán ao longo da xornada:
- Obradoiro de Iniciación ao torno cerámico: A Asociación Galega da Cerámica e outras Artesanías (Gondomar) dirixirá esta actividade, na que os participantes poderán elaborar pezas de barro e coñecer as características da olería tradicional galega.
- Encadernación xaponesa e marmolado: Os artesáns María José Martínez e José Antonio Carrera, de Peixesapop (Vigo), serán os encargados de impartir dous talleres. No primeiro, os asistentes crearán cadernos con diferentes técnicas de encadernación xaponesa. No segundo, poderán aprender a técnica do marmolado, que permite crear motivos decorativos sobre papel e tecido a partir de pinturas que flotan sobre a auga.
A xornada completarase coa actuación en directo do dúo acústico Deuce, a partir das 13:00 horas.
