A Confederación Intersindical Galega (CIG) de Correos denuncia a grave situación de «caos e descontrol» que afecta a oficina de reparto do Porriño, un centro neurálgico para a comarca. Segundo a central sindical, a falta de persoal e unha xestión deficiente levaron a unha acumulación alarmante de envíos: 10.000 paquetes e 2.400 notificacións administrativas están sen entregar.
Este colapso non só afecta a máis de 20.000 habitantes, senón tamén a máis de 300 empresas, que non están a recibir un servizo adecuado e poden ter problemas con prazos legais. A CIG asegura que a situación é «insostíbel» tanto para os cidadáns como para os traballadores.
Precarización do servizo e do persoal
A CIG sinala que, a pesar de que o Estado renovou a Correos a prestación do Servizo Postal Universal (SPU), a empresa incumpre sistematicamente os parámetros de calidade. O sindicato recalca a presión e o estrés que sofren os traballadores, o que leva a un aumento de accidentes laborais e enfermidades.
Mentres os empregados se enfrontan a condicións laborais precarias e salarios «de miseria», o sindicato critica a contradición de que a dirección da empresa pague «multas millonarias por incumprir os seus compromisos» e non invista en máis contratacións. Unha situación que a CIG contrasta co salario anual de 200.000 euros que percibe o presidente da entidade.
Ante esta situación, a CIG esixe a cobertura inmediata de todas as prazas para garantir un servizo público de calidade e condicións de traballo dignas. O sindicato tamén cuestiona por que a Ministra de Traballo, Yolanda Díaz, non intervén ante o grave deterioro laboral e de servizo que se vive nesta empresa pública.
