O Goberno de Pedro Sánchez recoñece ante as preguntas dos senadores do PP lucense -José Manuel Barreiro, José Manuel Balseiro e Juan Serrano- que “non puxo en alugueiro a prezos accesibles as vivendas da Sareb como prometera en campaña electoral”.
Así se desprende da resposta oficial do Goberno de España ás preguntas formuladas polos senadores en relación á dispoñibilidade de inmobles na provincia susceptibles de converterse en vivendas de alugueiro social.
Se ben o Goberno confirma que dispón na provincia a través da Sareb -coñecido como banco malo e que actualmente está participada e controlada polo Ministerio de Hacienda- de máis de 180 vivendas e en torno a 90 solos, non especifica en que condicións xurídicas, técnicas e de adecuación se atopan. Así mesmo, recoñece que non están traspasadas á nova Empresa Pública de Vivenda para formar parte do parque público de vivenda accesible.
“Á vista de que tampouco aclara en que municipios se atopan esas vivendas ou solos da Sareb, volveremos a formular outra pregunta para que o Goberno aclare onde se atopan e saber se o Estado dispón de propiedades que se puideran dirixir a alugueiro a prezo razoable nos municipios onde hai demanda”, avanzan.
Os senadores populares falan dun “novo incumprimento” de Sánchez en materia de vivenda que afecta a todo o país toda vez que Sánchez anunciara en campaña electoral a posta en alugueiro de 50.000 pisos da Sareb (Sociedade de Gestión de Activos Procedentes de la Reestructuración Bancaria).
OUTRAS PROPIEDADES DO ESTADO INFRAUTILIZADAS
Os populares subliñan que “se a estas 180 vivendas se engaden outras propiedades do Goberno do Estado infrautilizadas como os 100 inmobles baleiros que ten na provincia Adif (Administrador de Infraestruturas Ferroviarias) en diferente estado de conservación e que, nalgúns casos, requirirían da súa rehabilitación, poderían incorporarse ao parque público estatal preto de 300 vivendas entre ambos organismos”.
