A Xunta de Galicia reafirma o seu compromiso co deporte base e de elite ao colaborar co Club Porta Miñá na organización do Campionato Galego de Natación Absoluto de Inverno. A cita terá lugar na piscina municipal de Frigsa entre os días 27 e 29 de decembro.
O director territorial da Consellería de Presidencia, Xustiza e Deportes, Javier Vázquez Nodal, participou hoxe na presentación do evento, que congregará a preto de 400 deportistas procedentes dunha trintena de clubs de toda a xeografía galega. Durante o acto, Nodal gabou o labor do club lucense na promoción da actividade física entre a mocidade e destacou o impacto positivo que este tipo de competicións teñen para a cidade.
«Atraer campionatos deste nivel non só fomenta o deporte, senón que consolida a Lugo como un escenario estratéxico e idóneo para acoller grandes eventos de ámbito autonómico e nacional», sinalou o director territorial.
