José Luis Calo, coordinador de UCIN Galicia denuncia a recepción oficial da obra na Avenida Rosalía de Castro, no Milladoiro, a pesar de que os traballos presentan «graves deficiencias» que comprometen a seguridade e a mobilidade dos veciños. Segundo Calo, a aceptación da obra nestas condicións vulnera a normativa vixente e supón un prexuízo directo para o interese público.
Unha «obra chapuza» que ignora a accesibilidade
José Luis Calo sinala que os fallos detectados non son «simples remates menores», senón incumprimentos estruturais. Entre as irregularidades máis graves, destacan o incumprimento da Lei de Accesibilidade, con beirarrúas que presentan pendentes inadecuadas e obstáculos que impiden o tránsito de persoas con diversidade funcional.
Calo tamén denuncia o emprego de materiais de baixa calidade, visibles en pavimentos que xa presentan deterioración prematura antes de seren estreados, así como aliñacións incorrectas e acabados deficientes que non se corresponden co proxecto aprobado.
Responsabilidades legais e económicas
O Coordinador de UCIN Galicia advirte de que recibir unha obra con estes defectos contravén a Lei de Contratos do Sector Público. «Aceptar estes traballos nestas condicións é unha irresponsabilidade que traslada á cidadanía os custos dunha mala xestión e dunha execución deficiente»..
Ademais, alerta de que esta decisión pode derivar en responsabilidades técnicas, administrativas e contables se non se corrixen os fallos de inmediato.
Exixencias inmediatas
Ante a gravidade da situación, Calo solicita ao Concello:
- Unha revisión técnica integral e independente de toda a avenida.
- A corrección urxente de todas as deficiencias antes de dar a obra por concluída.
- A publicación da acta de recepción e dos informes técnicos que a avalan.
- A depuración de responsabilidades tanto políticas como técnicas.
«A defensa do interese público exixe obras ben executadas e duradeiras, non actuacións precipitadas que se converten nun problema para a veciñanza desde o primeiro día», conclúe.
