A sede da Xunta de Galicia en Lugo converterase, o próximo 29 de xaneiro, nun espazo para a memoria histórica coa proxección do documental “A mili no Sáhara”. Esta obra, impulsada pola Fundación e a Asociación Nacional de Veteranos do Sáhara, rescata as vivencias dos mozos que, ata mediados dos anos 70, cumpriron o servizo militar nun dos escenarios máis singulares e convulsos da época.
O delegado territorial, Javier Arias, presentou hoxe o acto acompañado por Julio Méndez, representante do colectivo na provincia e veterano daquela etapa. Durante o encontro, destacaron que o documental non é só unha crónica militar, senón un testemuño humano baseado en material inédito e vivencias persoais que axudan a entender unha parte fundamental da nosa historia recente.
Datos do evento e inscrición
A cita terá lugar ás 19:00 horas con entrada libre e de balde. Debido ao aforo limitado, as persoas interesadas en asistir deben realizar unha inscrición previa a través do correo electrónico: juliomendezmdellano@hotmail.com.
Un compromiso coa memoria
Esta proxección complementa o traballo que a Asociación de Veteranos vén desenvolvendo na provincia, como a recente exposición itinerante que visitou a Biblioteca Pública Provincial. Ademais, o colectivo mantén activo un portal web que serve de ponte entre xeracións, permitindo que os veteranos compartan recordos mentres os máis mozos descobren a dureza e a fraternidade da vida no deserto.
