Os populares denuncian que as 153 prazas de estacionamento seguen sen uso dende a inauguración do edificio en 2024, mentres os vehículos invaden zonas peonís durante os eventos.
O Grupo Municipal do Partido Popular levará á vindeira comisión unha pregunta oficial para que o Goberno local explique por que o aparcadoiro do Auditorio Fuxan os Ventos permanece pechado ao público.
A pesar de que a infraestrutura entrou en funcionamento en decembro de 2024, as súas dúas plantas de soto, que suman un total de 153 prazas de estacionamento, seguen sen estar a disposición da cidadanía case un ano e medio despois.
Dende o PP sinalan o «sinsentido» de manter bloqueada unha instalación destas características. «Resulta incomprensible que, cada vez que hai concertos, congresos ou actividades culturais, sexa case imposible estacionar na contorna mentres un espazo con capacidade de sobra permanece pechado con chave», explican os populares.
Esta situación está a xerar problemas de orde pública e accesibilidade:
- É habitual ver vehículos estacionados en zonas non permitidas, como os accesos pola Avenida de Magoi.
- A falta de servizo afecta tanto ao público como aos artistas e persoal técnico que traballa no auditorio.
Mellora da accesibilidade
Para o Grupo Popular, a posta en marcha do aparcadoiro é unha cuestión de accesibilidade e orde. «Facilitar un lugar onde aparcar é esencial nun equipamento que aspira a ser un referente cultural. Non abrir o soto evidencia unha falta de planificación alarmante por parte do BNG», engaden.
Neste contexto, o PP formulará na comisión a seguinte cuestión:
Por que motivo o Goberno municipal mantén sen uso o aparcadoiro do Auditorio Fuxan os Ventos e cando ten previsto poñelo en funcionamento para dar servizo á cidadanía?”
