A Asociación As Carballeiras quere facer pública a súa profunda preocupación polo estado de degradación no que se atopa actualmente a área de autocaravanas das Costas do Parque. A entidade denuncia que o espazo, que debería ser unha carta de presentación de calidade para o turismo na cidade, presenta un estado de abandono inaceptable tras a falta de mantemento continuado por parte da administración local.
A asociación sinala que este punto, que recibe visitantes durante todo o ano, acumulou unha serie de deficiencias graves que poñen en risco tanto a seguridade das persoas usuarias como a imaxe da cidade:
- Deficiencias eléctricas: A instalación eléctrica, vital para o funcionamento do servizo, presenta un estado de deterioro alarmante que podería derivar en problemas graves de seguridade.
- Sinalización deficiente: A falta de mantemento na sinalización dificulta a orientación dos viaxeiros, transmitindo unha imaxe de desatención e descoido impropia dun espazo público.
- Falta de hixiene e mantemento: A área carece das actuacións de limpeza e conservación periódicas necesarias para garantir unhas condicións mínimas de hixiene e salubridade.
- Mobiliario urbano deteriorado: O valado de madeira da contorna continúa sen ser reparado a pesar dos danos visíbeis dende hai tempo, o que evidencia a falta de resposta ante as necesidades do equipamento.
Para a Asociación As Carballeiras, a área das Costas do Parque é unha infraestrutura de interese turístico que require unha xestión á altura das necesidades dos visitantes e da propia veciñanza. «Non podemos permitir que un espazo estratéxico para o noso turismo se degrade deste xeito por pura desidia administrativa», sinalan dende a entidade.
Por todo isto, a asociación solicita ao Concello de Lugo que actúe de xeito inmediato, priorizando a reparación das instalacións e establecendo un calendario de mantemento periódico que garanta a seguridade, a calidade e a boa imaxe deste espazo público de xeito sostido no tempo.
