O portavoz do Grupo Municipal Socialista, Miguel Fernández, mantivo un encontro con representantes do tecido asociativo e veciñanza de Fontiñas e San Roque para analizar as necesidades prioritarias da contorna. Na reunión, Fernández debullou a súa folla de ruta para resolver os problemas de mobilidade e dotación de equipamentos públicos, situando a culminación da Avenida Vilaverde como a actuación máis estratéxica para a zona leste de Lugo.
Segundo explicou o líder socialista, a execución deste vial clave permitirá unha redistribución máis eficiente dos fluxos de tráfico, aliviando a elevada intensidade circulatoria que soporta actualmente a Avenida de Fontiñas. «O desenvolvemento da Avenida Vilaverde non é simplemente abrir unha nova rúa. É ordenar urbanisticamente toda esta parte da cidade, crear unha alternativa real aos desprazamentos actuais e preparar Fontiñas para o Lugo das próximas décadas», afirmou.
A culminación deste eixe viario non só mellorará os itinerarios internos, senón que dará resposta a unha das principais demandas veciñais ao crear ao redor de 300 novas prazas de estacionamento. Así mesmo, facilitará unha comunicación peonil moito máis cómoda e segura entre Fontiñas, San Roque e a zona alta da cidade mediante rúas transversais nos carrís que agora permanecen pechados.
«Nós deixamos clara a nosa posición. Se Candia continúa instalada na parálise, este será un dos proxectos que asumiremos como prioritarios no noso regreso á Alcaldía. Lugo non pode seguir perdendo oportunidades por culpa da falta de ambición e de planificación do actual Goberno municipal», denunciou Fernández, quen lamentou tamén a inacción do Executivo autonómico de Alfonso Rueda.
Un novo centro sociocultural para pechar a rede da zona sur
Durante o encontro coa veciñanza, Fernández abordou a necesidade de reforzar os servizos públicos e anunciou a súa intención de impulsar un novo centro sociocultural destinado a prestar servizo aos barrios de Fontiñas, San Roque e Augas Férreas. Con este equipamento, búscase pechar a rede municipal na zona sur do municipio, conectando o centro Maruja Mallo e o espazo sociocultural de Fingoi.
«O enorme crecemento residencial desta contorna, especialmente en Montirón, debe ser acompañado da creación de equipamentos municipais que fomenten o desenvolvemento cultural e educativo, funcionando como nexo de conexión social», explicou o portavoz socialista.
Finalmente, Fernández comprometeuse a manter unha interlocución permanente co tecido asociativo da zona para incorporar novas demandas á folla de ruta do PSdeG. «As transformacións importantes non nacen dos despachos; nacen do diálogo coa veciñanza. Ese seguirá sendo o noso modelo de cidade», concluíu.
