A alcaldesa de Lugo, Elena Candia, valorou moi positivamente o arranque dos traballos correspondentes ao último tramo da autovía que conecta a capital lucense con Sarria. Candia qualificou este fito como «unha magnífica noticia« para os veciños da cidade e do conxunto da provincia.
A actuación supón un importante pulo ás infraestruturas viarias da zona, cun investimento total de 37,7 millóns de euros destinados á execución de 13,5 novos quilómetros de autovía. Trátase duns traballos estratéxicos deseñados para transformar a mobilidade e mellorar de xeito substancial as comunicacións no interior de Galicia.
En palabras da rexedora municipal, “é unha actuación que mellorará a conectividade, reforzará a seguridade viaria e facilitará os desprazamentos de máis de 100.000 persoas”, poñendo de manifesto o impacto directo que a infraestrutura terá na calidade de vida dos usuarios habituais da vía e no desenvolvemento económico da contorna.
Agradecemento ao compromiso da Xunta de Galicia
Co inicio destas obras dase un paso decisivo para a conclusión definitiva do eixe Lugo-Sarria. A alcaldesa quixo amosar o seu recoñecemento á administración autonómica polo seu impulso constante aos proxectos de vertebración do territorio lucense.
«Grazas á Xunta de Galicia por seguir cumprindo co compromiso de investir en Lugo e en proxectos que contribúen a facer unha cidade e unha provincia mellor comunicada, máis segura e con máis oportunidades”, concluíu Elena Candia.
Con esta intervención, reforzase o compromiso institucional por dotar a Lugo de vías de alta capacidade que garantan uns desprazamentos máis fluídos, cómodos e, sobre todo, seguros para a cidadanía.
