O Concello de Ponteceso emitiu unha alerta preventiva tras ter coñecemento de varios episodios nos que persoas desconectadas da contorna acudiron a domicilios de persoas maiores en distintas parroquias do municipio. Segundo as alertas recibidas, estas persoas solicitan auga ou empregan calquera outra escusa similar como vía para tentar entrar no interior dos inmobles.
Diante desta situación, o Concello trasladou unha serie de recomendacións básicas para protexer especialmente aos colectivos máis vulnerables:
Recomendacións de seguridade
- Evitar abrir a porta a descoñecidos ou permitirlles o paso á vivenda, sobre todo se non se conta cun aviso ou cita previa.
- Manter un seguimento estreito por parte dos familiares sobre as persoas maiores do contorno, informándoas desta alerta e das precaucións que deben tomar.
- Contactar inmediatamente coas forzas de seguridade ou cos servizos de emerxencia ante calquera actitude sospeitosa ou intento de acceso non autorizado.
Desde o Concello aclarase que se trata dunha medida estritamente preventiva co obxectivo de evitar posibles incidentes e chámase a extremar o coidado no día a día das nosas comunidades.
