Os populares demandan datos desagregados por anualidades e tipoloxías delituosas para avaliar se os recursos da Policía Nacional destinados á provincia son suficientes.
Os senadores do PP por Lugo, José Manuel Barreiro, José Manuel Balseiro e Juan Serrano, rexistraron unha pregunta escrita no Senado dirixida ao Goberno do Estado co obxectivo de coñecer con detalle a evolución da criminalidade na provincia de Lugo entre os anos 2018 e 2026 e analizar se os medios humanos e materiais asignados á Policía Nacional responden á realidade actual.
Na iniciativa parlamentaria, os senadores lucenses lembran que a evolución da delincuencia constitúe un dos principais indicadores para avaliar a eficacia das políticas de seguridade pública e a adecuación dos recursos destinados a garantir a protección da cidadanía.
Por este motivo, solicitan ao Executivo que facilite información desagregada por anualidades e polas principais tipoloxías delituosas, co fin de contar cunha radiografía completa da evolución da criminalidade na provincia ao longo dos últimos anos.
Ademais, os populares preguntan ao Goberno de Sánchez se, á vista dos datos rexistrados, considera xustificado manter sen un reforzo suficiente os efectivos e os medios materiais da Policía Nacional destinados á provincia de Lugo.
Os senadores do PP de Lugo recordan que a seguridade cidadá debe ser unha prioridade e defenden que as decisións sobre a dotación de recursos policiais deben basearse en datos obxectivos e actualizados, garantindo que a Policía Nacional dispoña dos efectivos e dos medios necesarios para desempeñar o seu labor con eficacia e ofrecer a mellor resposta ás necesidades da provincia.
