O Grupo Parlamentario Socialista rexistrou no Parlamento de Galicia unha batería de iniciativas, impulsadas pola deputada Patricia Iglesias, nas que reclama á Xunta a posta en marcha dun plan de choque específico e con dotación orzamentaria suficiente para frear a perda de poder adquisitivo das familias galegas. O texto, que se debaterá en comisión e no pleno, exixe medidas urxentes ante a escalada continuada dos prezos na comunidade.
A iniciativa susténtase nos últimos datos do Índice de Prezos de Consumo (IPC). En agosto, o indicador subiu en Galicia un 4,8 % interanual (sete décimas máis que en xullo e medio punto por riba da media estatal do 4,3 %). Trátase da segunda taxa máis alta de todo o Estado, só por detrás de Cantabria, e o nivel máis elevado na comunidade desde xaneiro de 2023. No que vai de ano, os prezos acumulan en territorio galego unha suba do 4 %, fronte ao 3,3 % do conxunto de España.
Impacto directo nas familias e inmobilismo autonómico
A parlamentaria socialista afeou a pasividade do Executivo autonómico ante unha situación que golpea directamente ás economías domésticas. «Levamos seis meses seguidos cunha inflación máis alta que a media española e a Xunta segue instalada no comentario dos datos, como se isto fose unha cuestión meteorolóxica», afirmou Iglesias.
A deputada subliñou que o encarecemento da vida en Galicia non é casualidade e advertiu do risco inminente de exclusión social: «Cando o recibo da luz, a bombona e o depósito do coche soben ao mesmo tempo, hai casas nas que xa non se trata de recortar caprichos, senón de decidir que factura se deixa de pagar».
O motor desta suba atópase nos sectores básicos: o grupo de transportes encareceuse un 11 % interanual, mentres que os gastos vinculados á vivenda, auga, electricidade, gas e outros combustibles medraron un 9,3 %. Ademais, as previsións do Instituto Galego de Estatística (IGE) apuntan a que a inflación continuará escalando ata o 5,3 % neste mes de setembro.
Tres eixes de actuación e apoio ao tecido produtivo
A iniciativa rexistrada polo PSdeG pon tamén o foco na asfixia que sofren o comercio, a hostalaría, o sector primario e as pequenas e medianas empresas, cuxas marxes de viabilidade están ao límite polos altos custos de funcionamento. «Unha panadaría, un taller ou un transportista non poden trasladar ao prezo final todo o que lles sobe o gasóleo; ou se lles bota unha man, ou acaban pechando», engadiu Iglesias.
Neste sentido, os socialistas reclaman á Xunta tres compromisos concretos:
- Aprobación dun plan de choque contra a inflación con orzamento propio.
- Reforzo das axudas contra a pobreza enerxética para protexer aos fogares máis vulnerables.
- Activación de medidas extraordinarias de apoio a autónomos e pemes nos sectores máis castigados polo custo da enerxía.
O PSdeG contrapuxo a «inacción» da Xunta coa capacidade de resposta do Goberno central, que desde o 1 de setembro elevou a 20 céntimos por litro a rebaixa do imposto de hidrocarburos aplicable ao gasóleo. «Galicia ten competencias, ten recursos propios e ten un problema de prezos peor que a media do Estado. O que non ten é un goberno disposto a usalos», sentenciou a deputada.
