O PP defenderá no pleno a creación dunha axuda para conservar viñedos en socalcos nas ribeiras de Monforte

por Redacción Lugo

Os populares ven necesario que o Concello de Monforte poña en marcha unha liña de axudas de ata 5.000€/ano para manter este tipo de cultivos «un dos sinais de identidade do municipio e da comarca»

O Grupo Municipal do PP de Monforte defenderá no pleno deste mes unha iniciativa para que o goberno local apoie a recuperación de viñedos nos bancais que hai no municipio outorgando, para este fin, axudas económicas de ata 5.000€ ao ano.

O concelleiro popular, Emilio Vázquez, ve “necesaria” esta medida encamiñada a “incentivar a recuperación destes bancais nas ladeiras do Sil e en parcelas de máis do 35% de pendente media” xa que “é un dos sinais de identidade do noso municipio e da comarca e temos que axudar a que non se perda”.

Dende o PP de Monforte entenden que o sector vitivinícola “ constitúe un sector económico que xera riqueza e emprego” sendo un dos principais factores que xeran “economía, territorio, paisaxe, patrimonio e turismo”.

A comarca de Lemos conta con máis de 1.100 hectáreas de viñedos, repartidas entre 7.000 explotacións vitícolas e orientadas maioritariamente (sobre o 95%) á produción de uva para elaboración de viño tinto. “Trátase dunha viticultura cunha tipoloxía característica que ten a súa orixe no aproveitamento das condicións orográficas das ladeiras do Sil e do Miño nas que o viñedo se cultiva na forte pendente do terreo mediante socalcos que buscan conter a terra, reter a auga de choiva e maximizar a captación solar”, explicou.

Pola súa banda, a voceira popular, Katy Varela, recorda que Monforte, noutrora de gran importancia vitivinícola, conta con 120 hectáreas de viñedo en cultivo dedicadas en gran medida ao autoconsumo. “Deste total, 15 hectáreas se cultivan nas ladeiras do río Sil, aos pés do Mirador do Duque e se atopan amparadas polo cualificativo de calidade diferenciada “Ribeira Sacra”, explicou. A pesar de que a superficie de viñedo amparada pola protección da Denominación de Orixe Ribeira Sacra no concello de Monforte é pouco representativa respecto á outros concellos da contorna, “é fundamental colaborar co sector vitivinícola” para sufragar a importante perda económica e a repercusión que pode conlevar na economía da comarca o abandono do cultivo e posterior perda desa paisaxe que tanto caracteriza a nosa ribeira do Sil e que funciona como reclamo turístico e motor económico da comarca.

Etiquetas , ,
Comparte éste artículo
Escribe tu comentario