A Unión Comarcal de CCOO de Lugo presentou alegacións ao proxecto de Orzamentos do Concello de Lugo para o ano 2026 denunciando que a súa elaboración, especialmente no Capítulo I relativo ao persoal, realizouse sen ningún tipo de negociación coa representación legal das persoas traballadoras. O sindicato afirma que o goberno municipal aprobou inicialmente unhas contas que afectan directamente ás condicións laborais e retributivas do persoal municipal sen convocar a Mesa Xeral de Negociación nin facilitar a documentación necesaria para poder analizar e debater as decisións adoptadas.
Segundo CCOO, o orzamento incorpora partidas de gran relevancia como a produtividade, a carreira profesional ou as gratificacións sen explicación suficiente sobre os criterios de reparto, os incrementos previstos nin o impacto real por servizos, o que impide coñecer con transparencia como se pretende distribuír unha parte importante do gasto de persoal.
Ademais, CCOO lembra que existen cuestións estruturais pendentes que requiren planificación e negociación real, como a actualización e negociación da Relación de Postos de Traballo (RPT), a regulación da xornada en servizos especiais, a elaboración e o desenvolvemento efectivo do Plan de Igualdade ou o reforzo da formación vinculada á carreira profesional.
Para o sindicato, non é aceptable que un orzamento municipal que condiciona a organización do traballo e as retribucións do persoal se elabore sen diálogo social nin transparencia.
Por iso, CCOO solicita que se retrotraia o procedemento de aprobación do orzamento no relativo ao Capítulo I e á plantilla, para abrir un proceso real de negociación coa representación sindical e garantir que as decisións sobre persoal municipal se adopten con información, transparencia e respecto á negociación colectiva.
Desde CCOO advirten de que o diálogo social non pode ser ignorado cando se trata de decidir sobre os dereitos laborais e a organización do persoal que sostén os servizos públicos municipais.
