O secretario xeral do PSdeG celebra no antigo cemiterio de Canido a catalogación de 22 espazos históricos e avisa de que «a ultradereita xa gobernou España e custou décadas recuperar a liberdade»
O secretario xeral do PSdeG, José Ramón Gómez Besteiro, celebrou hoxe en Ferrol a publicación no Boletín Oficial do Estado (BOE) da resolución que declara oficialmente a cidade como Lugar de Memoria Democrática. O líder socialista fixo estas declaracións dende o histórico muro do instituto de Canido, ergueito sobre o antigo cemiterio civil onde a represión franquista fusilou a defensores da liberdade. «Cumprimos o noso compromiso», celebrou Besteiro, definindo esta catalogación como «un recoñecemento á cidade e á xente que loitou pola liberdade, a igualdade e os dereitos».
Acompañado por entidades memorialistas, Besteiro lembrou que este proceso se iniciou hai xusto un ano ao abeiro da Lei de Memoria Democrática impulsada polo Goberno de Pedro Sánchez en 2022. A resolución, asinada o pasado 21 de outubro, pon en valor a tradición de loita obreira da cidade —dende as folgas da antiga Bazán ata os sucesos do 10 de marzo de 1972— e blinda un total de 22 espazos emblemáticos. Entre eles figuran o Castelo de San Felipe, o estaleiro de Navantia, o monumento ao 10 de marzo e o monolito dedicado a Pablo Iglesias, nado en Ferrol.
Vixilancia sobre Concello e Xunta para a conservación dos espazos
A declaración de Lugar de Memoria implica a obrigación legal de conservar e sinalizar debidamente estes espazos. Ante isto, o líder socialista foi rotundo ao advertir que o partido estará vixiante: «Agora lles toca ao Concello e á Xunta facer a súa parte para que a cidadanía os coñeza, e estaremos vixiantes para que así se faga».
Para Besteiro, reivindicar a memoria é hoxe máis necesario ca nunca, non só por xustiza coas vítimas, senón como antídoto fronte aos discursos reaccionarios: «Non debemos esquecer que a ultradereita xa gobernou este país e que fixeron falta décadas para recuperar a liberdade», subliñando que a memoria democrática é «unha ferramenta imprescindible para protexer o presente e o futuro da nosa democracia».
O PSdeG marca prioridades ante a crise ferroviaria: «O primeiro son as vítimas e a verdade»
Preguntado pola prensa sobre a actualidade estatal e a situación do ministro de Transportes, Óscar Puente, tras o recente accidente ferroviario de Urda (Toledo), Besteiro apostou pola coherencia e marcou unha estricta orde de prioridades institucionais.
- Atención ás vítimas: O líder do PSdeG insistiu en que a prioridade absoluta segue sendo «atender as vítimas e as súas familias», un traballo de acompañamento que debe prolongarse no tempo.
- Investigación transparente e depuración de responsabilidades: En relación coas investigacións independentes e xudiciais xa en marcha, reclamou coñecer con exactitude os fallos rexistrados. «Cando esa investigación diga cales son as responsabilidades, chegará o momento de depurar todas as responsabilidades políticas e as que non sexan», apuntou.
- Exixencia de rendición de contas: Besteiro valorou positivamente que o ministro dea a cara e compareza a petición propia na Deputación Permanente do Congreso: «O que lle pido ao Goberno é que non escape, que non mire para outro lado, senón que dea toda a información da que dispón e que non entorpeza a investigación».
