A entidade veciñal alerta da existencia de espazos intransitables e situacións que poden supoñer un risco para a seguridade da veciñanza
Unha zanxa aberta na beirarrúa da rúa Escocia e unha vivenda con perigo de derrubo na rúa Armórica figuran entre os problemas detectados
Lugo, 4 de xuño de 2026. A Asociación Veciñal As Carballeiras quere trasladar a súa preocupación polo estado que presentan distintos puntos da zona sur da cidade de Lugo, onde a falta de actuacións de mantemento e conservación está a provocar situacións que afectan á mobilidade e á seguridade da veciñanza.
Dende a entidade sinalan que a beirarrúa da rúa Escocia se atopa actualmente nun estado que dificulta gravemente o tránsito peonil, especialmente para persoas maiores, familias con carriños infantís e persoas con mobilidade reducida. Segundo indican, a situación require unha intervención urxente para garantir unhas condicións adecuadas de accesibilidade.
Outro dos puntos que preocupa á Asociación localízase na rúa Armórica, onde existe unha vivenda que presenta un evidente perigo de derrubo. As Carballeiras considera necesario que as administracións competentes actúen con dilixencia para evitar posibles riscos para os peóns e para os inmobles da contorna.
Para a asociación, esta circunstancia evidencia a necesidade de revisar o estado das infraestruturas e actuar con rapidez para evitar que os problemas se agraven.
A Asociación As Carballeiras considera que o mantemento do espazo público e a prevención de situacións de risco deben ser unha prioridade para o Concello de Lugo, especialmente nos barrios da zona sur, onde a veciñanza demanda solucións efectivas a problemas que afectan ao seu día a día.
Por este motivo, a entidade solicita que adopten as medidas necesarias para resolver estas incidencias á maior brevidade posible e garantir unhas condicións adecuadas de seguridade, accesibilidade e conservación nos espazos públicos da cidade.
