A Santa de Francisco Asorey, unha das obras máis icónicas do patrimonio artístico galego, retornará a Galicia para quedar exposta de forma permanente na Cidade da Cultura. O traslado coincide co centenario da creación da escultura, realizada en 1926, e pon fin a máis de sete décadas de estancia en Montevideo.
Considerada unha peza clave para comprender a traxectoria de Asorey e un dos grandes fitos da escultura galega do século XX, a Santa é tamén un símbolo da memoria da emigración e da modernización cultural de Galicia no primeiro terzo do século pasado.
Unha obra histórica da diáspora
Unha obra histórica da diásporaPresentada orixinalmente na Exposición Nacional de Bellas Artes de Madrid en 1926, a peza foi adquirida en 1951 pola colectividade galega no Uruguai. Tras máis de sete décadas en Montevideo, a Xunta de Galicia adquiriuna en 2022 no marco do proceso de liquidación concursal da Casa de Galicia, xunto a un valioso fondo documental e bibliográfico.
Nese momento, a Administración autonómica acordou co Goberno uruguaio que a escultura fose exhibida no Museo Zorrilla. Con todo, os recentes cambios no relato expositivo desta institución e a reorganización da súa colección motivaron agora o seu traslado definitivo a Galicia, co obxectivo de garantir a idónea contextualización, estudo e contemplación da obra.
Retorno grazas á cooperación institucional
O regreso da Santa —que xa fora exhibida temporalmente na Cidade da Cultura na exposición Galicia, un relato no mundo, con máis de 46.000 visitas— é froito da colaboración entre a Xunta de Galicia, o Goberno do Uruguai, a dirección do Museo Zorrilla e o apoio das colectividades galegas na diáspora.
